京阪神姬之旅 ~ 嵐山, 晴明神社

關西之旅

Day 3 8月13 日(星期日) 晴れ/曇り気温34.2℃

由於之前已買了10點鐘，嵯峨野小火車的車票，今日8點左右由京都駅乘JR山陰本線，約27分鐘就到馬堀（呢個好細，同埋好有鄉村味），時間尚早又未食早餐，首先遠望周圍有無咖啡店，好彩有一間離車站無幾遠，細細間的咖啡店，門口的另一邊仲有一部烘培咖啡機正在工作中，好香～～。

入到店內問老闆有無早餐食，他說有吐司，於是每人叫了一份（好大份呀，吐司連咖啡約700円一份），

食飽飽散步往トロッコ列車的亀岡駅（只要由JR馬堀駅反方向無幾遠就到），沿路都有指示牌及好清幽，到咗トロッコ列車的亀岡駅內有一間紀念品店，買咗一架小火車的模型車仔留念。

到達車站時仲有30分鐘先有車，四圍影吓相，因為路軌旁有一排狸貓像，好趣緻，在冷氣休息室內有小火車的紀念蓋章，但已經印到冇乜色，好難才印到個完整的，望番出面坐激流船的集合點有一班人整裝待發去玩激流。

時間到啦，已經聽到火車聲，等住上車的乘客全部立即舉機影相，我哋當然都影番幾相啦，然後立即到２號車卡停留位準備上車。嘩！從嵯峨野到來的車箱內全部塞滿人，但又唔係好多上車喎。在車上仲可以自行換位，基本上可以話你鍾意坐邊都得。

終於開車，一開車我哋就不停影相同拍video，真係同傳聞一樣風景好靚，又有啲微風好舒服，坐呢種小火車都喺第一次，好有Feel。

沿途望保津川都見到玩激流的人向我哋Say Hello，所以都同佢哋影咗啲相，車上有日語講播架車到咗邊同周圍的環境，又有啲工作人員問我哋影唔影合照等等，穿過一個又一個的隧道後，

有隻惡鬼上咗車，由車頭行到車尾，當嚟到我哋坐的一卡時，他景向我哋搭訕，佢問我哋從邊個地方嚟？答佢從澳門（日文），佢話唔知邊度，咁咪話在香港附近，聊咗幾句，最後他仲祝我哋幸福快樂㖭！之後就到保津川峽的站，突然聽到隻惡鬼話落車，望出車站位置他仲搞鬼到辦跳涯，真搞笑。

之後好快就到目的地嵐山站，原來都有好多人落車，落車同時，當然影張車頭相先，出了車站後想起都無人檢查車票或收車票既，真奇怪。

跟著人群及指示路牌不經不覺就去到竹林之道。竹林之道兩旁的竹真係好高，穿過竹林就見到天龍寺的北門。

由天龍寺北門進入曹源池庭園，沿著庭園見到好多人在天龍寺內參觀，由於要順路的關係，我哋只從外圍參觀天龍寺，另一方面入寺又要買另一張入場券，所以決定在門口影張相就順路由正門離開。

在天龍寺正門的街道有好多食店和手信店，而早前在網站上搜尋咗一間好特別的精品店，店名まゆ村，喺賣繭人形（用蠶繭做的精品）；據聞店主好親切的，位置在一條很窄的小巷，好在有個燈籠在巷口，舖仔細細但有限多唔同類形的擺設，結果在店主夫婦的親切招待下就買咗免同虎的生肖，另外又買了一份地藏公仔，每種擺設均有一支長形的旗，可以由店主即場寫上祝福字句，至於寫乜由你話事。

之後到咗渡月橋，又多人，又曬。

當時溫度相信不止35度，所以返回天龍寺一帶食宇治金時沙冰，果然好味，暑氣全消。

跟著要去金閣寺，所以要在嵐山的京福電鐵站（呢個站有個地方俾人浸腳，不過入閘後就差不多開車，所有無浸）乘只有一卡的電車到北野白梅町（而呢個站出閘時，喺人手收車票的），再搭204,205,101或102都可到達金閣寺。在金閣寺道下車步行往金閣寺，入口處人頭擁擁，在金閣寺的正面位置堆滿人影相，實在不可由正面拍攝，只好在旁邊及後面比較少人的地方影啦！另外當時突然陰天，令金閣寺唔夠金光閃閃，從山上走見到有人拋錢到一個小石像，好似許願咁，我哋照樣拋個５円結緣，之後就離開。

返回金閣寺道搭12號到一條戾橋，過一條馬路步行2-3分鐘就到晴明神社，雖然呢條橋同神社都細細咁，但背後的故事都幾特別（有興趣可參考旅遊書或問我）。

由於時間比預定的早，開始覺得肚餓，返回落車的車站搭番12號在四條鳥丸落車，去錦市場食小食及飲豆漿（真係好飲，有濃郁的豆味），我哋買到邊就食到邊；繼續在四條通一帶購物，不過在新京極通內又會有一間天滿宮的神社，之後去咗買Porter袋。行行吓都差不多6:30，記得要返伊勢丹買BlueLable，返到去果然有收獲仲不止一個㖭，一個清閒的夜晚，於是在京都駅四圍影相，從伊勢丹的頂層影吓京都塔；